حیدرآباد: ایم آر پی ایس کے بانی مندا کرشنّا مادِیگا نے چیف منسٹر ریونت ریڈی پر الزام عائد کیا ہے کہ انہوں نے تلنگانہ میں Pensionersکو دھوکہ دیا ہے اور کانگریس حکومت انتخابات سے قبل کیے گئے وعدوں کو 19 ماہ گزرنے کے باوجود پورا کرنے میں ناکام رہی ہے۔
یہ الزامات انہوں نے رنگا ریڈی ضلع کے اممنگل میں معذور افراد اور آسرا پنشن حاصل کرنے والوں کے ضلعی اجلاس سے خطاب کرتے ہوئے لگائے۔ مندا کرشنّا مادِیگا نے کہا کہ حکومت نے اقتدار سنبھالتے ہی معذور افراد کو ماہانہ 6,000 روپئے اور آسرا استفادہ کنندگان کو 4,000 روپئے دینے کا وعدہ کیا تھا، مگر تاحال کوئی عمل آوری نہیں ہوئی، جو ایک کھلا دھوکہ ہے۔
انہوں نے الزام عائد کیا کہ حکومت نے پنشنرز کے لیے مختص 20,000 کروڑ روپئے کی رقم کو دیگر مقاصد کے لیے منتقل کر دیا ہے، اور ہر ماہ تقریباً 1,000 کروڑ روپئے کی کمی کا سامنا کیا جا رہا ہے۔ ان کا کہنا تھا کہ غریب عوام کا حق مارا جا رہا ہے اور فنڈز کو گمراہ کن طریقے سے دوسری جگہوں پر استعمال کیا جا رہا ہے۔
یہ اجلاس “ڈِس ایبلٹی رائٹس اسٹرگل کمیٹی” کے زیر اہتمام منعقد ہوا، جس میں مندا کرشنّا مادِیگا نے ریاست بھر کے پنشنرز سے اپیل کی کہ وہ 13 اگست کو حیدرآباد میں منعقد ہونے والے بڑے احتجاجی پروگرام “پنشنرز گرجنا” میں بھرپور شرکت کریں۔
