حیدرآباد: تلنگانہ ریاست کو عالمی سطح پر ایک اور اعزاز حاصل ہوا ہے، جب اسے مس ورلڈ 2025 کے 72ویں ایڈیشن کی میزبانی کے لیے منتخب کیا گیا ہے۔ یہ مقابلہ 7 مئی سے 31 مئی تک جاری رہے گا، جس کا فائنل 31 مئی کو حیدرآباد کے HITEX ایگزیبیشن سینٹر میں منعقد ہوگا۔
مس ورلڈ آرگنائزیشن کی چیئرپرسن جولیا مورلے اور تلنگانہ حکومت کی سیکریٹری برائے سیاحت، ثقافت، ورثہ اور امور نو جوانان، سمیتا سبھروال نے مشترکہ طور پر اس کا اعلانکیا۔ مورلے نے کہا کہ تلنگانہ کی ثقافتی وراثت، جدید ترقی اور مہمان نوازی عالمی سامعین کے لیے ایک مثالی نمونہ ہے۔ انہوں نے مزید کہا کہ یہ شراکت داری صرف ایک مقابلے کی میزبانی نہیں بلکہ کمیونٹیز کو بااختیار بنانے اور تنوع کا جشن منانے کا موقع ہے۔
سمیتا سبھروال نے کہا کہ تلنگانہ مس ورلڈ 2025 کی میزبانی پر فخر محسوس کرتا ہے۔ انہوں نے کہا کہ یہ ریاست اپنی روح، گرمجوشی اور بے پناہ صلاحیتوں کو دنیا کے سامنے پیش کرنے کے لیے تیار ہے۔
اس عالمی مقابلے میں 120 سے زائد ممالک اور علاقوں کی نمائندگیاں شرکت کریں گی، جو نہ صرف خوبصورتی بلکہ “مقصد کے ساتھ خوبصورتی” کے مشن کو بھی فروغ دیں گی۔ مقابلے کی شرکاء 7 مئی کو تلنگانہ پہنچیں گی، جبکہ موجودہ مس ورلڈ، چیکیا کی کرسٹینا پشکوا، 31 مئی کو اپنی جانشین کو تاج پہنائیں گی۔
تلنگانہ حکومت نے اس عالمی ایونٹ کی میزبانی کے لیے جامع منصوبہ بندی کی ہے، جس میں بنیادی ڈھانچے کی بہتری، سیاحتی مقامات کی تزئین و آرائش، اور ثقافتی تقریبات کا انعقاد شامل ہے۔ ریاست کے تاریخی مقامات جیسے رامپا مندر اور گولکنڈہ قلعہ کو عالمی سامعین کے لیے پیش کیا جائے گا۔
یہ ایونٹ نہ صرف تلنگانہ کی ثقافت اور مہمان نوازی کو دنیا کے سامنے لائے گا بلکہ ریاست کو عالمی سیاحت کے نقشے پر بھی نمایاں کرے گا۔
