حیدرآباد: سپریم کورٹ نے ملک بھر کے لاکھوں میڈیکل امیدواروں کے لیے ایک اہم فیصلہ سناتے ہوئے NEET-PG 2025 امتحان کو سنگل شفٹ میں منعقد کرنے کا حکم دیا ہے، اور نیشنل بورڈ آف ایگزامینیشنز ان میڈیکل سائنسز NBEMSکی دو علیحدہ سیشنس میں امتحان لینے کی تجویز مسترد کردی ہے۔
جسٹس وکرم ناتھ، جسٹس سنجے کمار، اور جسٹس این وی انجریا پر مشتمل تین رکنی بنچ نے بورڈ کو ہدایت دی کہ وہ دو علیحدہ اوقات میں امتحان منعقد کرنے کے منصوبے پر نظرثانی کرے۔
یہ حکم ان ڈاکٹروں کی جانب سے دائر کی گئی درخواست کی سماعت کے دوران آیا جنہوں نے مؤقف اختیار کیا تھا کہ دو مختلف سوالیہ پرچے امتحان کی غیرجانب داری کو متاثر کریں گے۔ ان کا کہنا تھا کہ چاہے سوالات کتنی ہی باریکی سے تیار کیے جائیں، ان کی مشکل سطح یکساں نہیں ہو سکتی، جس سے کچھ امیدواروں کو ناحق فائدہ پہنچ سکتا ہے۔
دوسری جانب NBEMS نے اپنا دفاع کرتے ہوئے کہا کہ تقریباً 2.5 لاکھ امیدواروں کے لیے امتحان کی یکساں ترتیب ایک لاجسٹک چیلنج ہے، اور اتنی بڑی تعداد میں موزوں مراکز کا انتظام ممکن نہیں۔
تاہم عدالت اس دلیل سے مطمئن نہیں ہوئی اور بورڈ کا مؤقف مسترد کردیا۔ بنچ نے کہا کہ امتحان کی تاریخ میں ابھی دو ہفتے باقی ہیں، اور بورڈ کے پاس مناسب مراکز کی شناخت کا کافی وقت موجود ہے۔ عدالت نے ریمارکس دیے کہ امتحان کو سنگل شفٹ میں منصفانہ طریقے سے منعقد کرنے کے لیے تمام انتظامات ممکن ہیں۔
واضح رہے کہ NEET-PG 2025 کا امتحان 15 جون کو منعقد ہونا ہے۔ اس فیصلے کے بعد تمام امیدوار ملک بھر میں ایک ہی وقت پر امتحان دیں گے، جس سے برابری کی بنیاد پر امتحان دینے کا موقع فراہم ہوگا۔
