حیدرآباد: پروگریسیو ڈیموکریٹک اسٹوڈنٹس یونین [en]PDSU Students[/en] سے وابستہ طلبہ نے پیر کے روز وزیر اعلیٰ ریونت ریڈی کی رہائش گاہ کے باہر احتجاج کرتے ہوئے زیر التواء فیس بازادائیگی اور اسکالرشپ رقم کی فوری اجرائی کا مطالبہ کیا۔
طلبہ نے حکومت کے خلاف نعرے لگاتے ہوئے کہا کہ ریاست میں انجینئرنگ کالجوں کی جانب سے ڈونیشن کے نام پر طلبہ کا استحصال جاری ہے، جس پر سخت قانونی کارروائی کی جانی چاہیے۔ انہوں نے الزام لگایا کہ یہ تمام کارروائیاں سرکاری قواعد کی خلاف ورزی کے باوجود جاری ہیں۔
پی ڈی ایس یو نے ریاستی حکومت پر الزام عائد کیا کہ وہ فیس ری ایمبرسمنٹ اسکیم کو ختم کرنے کی سازش کر رہی ہے، اور کسی بھی ایسی کوشش کے خلاف سخت مزاحمت کی وارننگ دی۔
احتجاجی طلبہ نے وزیر اعلیٰ اور ان کی حکومت پر طلبہ فلاحی اسکیمات کو نظرانداز کرنے کا الزام لگاتے ہوئے ان اسکیمات کے تحفظ کا مطالبہ کیا۔
پولیس نے موقع پر پہنچ کر احتجاج کرنے والے طلبہ کو حراست میں لے لیا۔
