حیدرآباد: تلنگانہ پولیس نے متنازعہ گچی باولی اراضی کے سلسلہ میں سخت احکامات جاری کرتے ہوئے غیر مجاز افراد کے داخلے پر مکمل پابندی عائد کر دی ہے۔ مقامی پولیس کو ہدایت دی گئی ہے کہ وہ ایسے تمام افراد کو روکے جو اس اراضی سے تعلق نہیں رکھتے، اور خلاف ورزی کرنے والوں کے خلاف سخت قانونی کارروائی کی جائے گی۔
یہ تنازع رنگا ریڈی ضلع کے سیرلنگم پلی منڈل کے کنچا گچی باؤلی کے سروی نمبر 25 میں واقع 400 ایکڑ اراضی سے متعلق ہے۔ سپریم کورٹ نے اس زمین پر ریاستی حکومت کی سرگرمیوں پر سخت ناراضگی کا اظہار کرتے ہوئے تمام کاموں کو فوری طور پر روک دینے کا حکم دیا ہے۔
عدالت نے حکومت سے سوال کیا ہے کہ آخر کس بنیاد پر اتنی عجلت میں کاروائی کی گئی اور مرکزی ماحولیاتی کمیٹی سے اجازت کے بغیر درختوں کی کٹائی کیوں کی گئی؟ عدالت نے نشاندہی کی کہ محض ایک دن میں 100 ایکڑ اراضی پر درخت کاٹ دینا سنگین معاملہ ہے، اور آئندہ سماعت 16 اپریل کو مقرر کی گئی ہے۔
عدالتی احکامات کے پیش نظر، پولیس نے اس اراضی پر کسی بھی قسم کی نقل و حرکت کو محدود کر دیا ہے۔ حکام کا کہنا ہے کہ جو بھی ان احکامات کی خلاف ورزی کرے گا، اس کے خلاف مؤثر قانونی کارروائی کی جائے گی تاکہ عدالتی فیصلوں پر مکمل عمل درآمد کو یقینی بنایا جا سکے۔
