حیدرآباد: جاری Phone Tapping Case کے سلسلے میں پربھاکر راؤ نے تلنگانہ ہائیکورٹ میں ایک عبوری درخواست دائر کی ہے، جس میں گرفتاری سے تحفظ دینے اور ان کی واپسی پر پولیس کارروائی سے روکنے کی ہدایت دینے کی اپیل کی گئی ہے۔
یہ عرضی منگل کے روز جسٹس جے سرینیواس راؤ کی عدالت میں سماعت کے لیے پیش ہوئی۔ اپنی درخواست میں پربھاکر راؤ نے دعویٰ کیا کہ انہیں فون ٹیپنگ کیس میں جھوٹا پھنسایا جا رہا ہے اور انہوں نے عدالت سے قبل از گرفتاری ضمانت دینے کی اپیل کی تاکہ واپسی پر انہیں گرفتار نہ کیا جائے۔
صحت کی بنیاد پر گرفتاری سے تحفظ کی درخواست
پربھاکر راؤ کی جانب سے پیش ہونے والے سینئر وکیل ٹی. نرنچن ریڈی نے عدالت میں دلائل دیتے ہوئے کہا کہ ان کے موکل کی عمر 65 سال ہے اور انہیں کئی طبی مسائل لاحق ہیں، جنہیں مدنظر رکھتے ہوئے قبل از گرفتاری ضمانت دی جانی چاہیے۔
وکیل نے مزید کہا کہ پربھاکر راؤ آئندہ ایک ہفتے میں بھارت واپس آنے کے لیے تیار ہیں، اس لیے عدالت پولیس کو ہدایت دے کہ ان کی واپسی پر انہیں گرفتار نہ کیا جائے۔
عدالت نے فریقین کے دلائل سنے اور کہا کہ معاملے پر غور کے بعد مزید ہدایات جاری کی جائیں گی۔
