حیدرآباد: [en]Rare Double Surgery[/en] کے ذریعے نظام انسٹی ٹیوٹ آف میڈیکل سائنسز (این آئی ایم ایس) کے ڈاکٹروں نے دل اور پھیپھڑوں کے دو مہلک عوارض میں مبتلا ایک مریض کی جان بچا کر اسے نئی زندگی دی ہے۔
کر یم نگر ضلع کے کوہیڈہ منڈل کے کچاپور گاؤں سے تعلق رکھنے والے رچاکونڈہ شیو پرساد راؤ کافی عرصے سے پھیپھڑوں اور دل کے شدید مسائل سے دوچار تھے۔ کئی ہسپتالوں سے رجوع کرنے کے باوجود حالت میں بہتری نہیں آئی۔ بالآخر انہوں نے این آئی ایم ایس سے رجوع کیا۔
تشخیص کے دوران ڈاکٹروں نے ان کے مرض کی مکمل اور تشویشناک تفصیل پیش کی۔ شیو پرساد کو کرونک تھرومبوایمبولک پلمونری ہائپرٹینشن (CTEPH) اور ٹرائی کسپیڈ ریگریجٹیشن نامی پیچیدہ امراض لاحق تھے، جو دل پر شدید دباؤ ڈالتے ہیں اور خون کی روانی کو متاثر کرتے ہیں۔
کارڈیو تھوراسک سرجری شعبہ کے سربراہ پروفیسر ڈاکٹر امریش اور ایسوسی ایٹ پروفیسر ڈاکٹر سوریا ستیہ گوپال کی قیادت میں ماہر ڈاکٹروں کی ٹیم نے دو مسلسل سرجریز کے ذریعے ان پیچیدگیوں کا کامیابی سے علاج کیا۔
اسپتال کے حکام کے مطابق ایسی سرجریز عام طور پر خانگی یا کارپوریٹ ہسپتالوں میں لاکھوں روپئے میں انجام دی جاتی ہیں، لیکن این آئی ایم ایس میں یہ مکمل طور پر آروگیہ شری اسکیم کے تحت مفت کی گئیں۔
ڈاکٹروں نے بتایا کہ مریض کی صحت یابی کا عمل جاری ہے اور وہ تیزی سے روبہ صحت ہے۔ انہوں نے اسے “دوسری زندگی کا موقع” قرار دیا۔ یہ کامیابی نہ صرف میڈیکل سائنس کی مہارت کی عکاسی کرتی ہے بلکہ ریاست میں غریب مریضوں کے لیے آروگیہ شری جیسی اسکیمات کی افادیت کو بھی اجاگر کرتی ہے۔
