حیدرآباد: گرمی کی شدت میں روزانہ تلنگانہ سکریٹریٹ آنے والے شہری پینے کے صاف پانی جیسی بنیادی سہولت سے محروم ہیں، کیونکہ سکریٹریٹ میں نصب واٹر پیوریفائر گزشتہ چھ ماہ سے خراب ہے، جس کی مرمت یا تبدیلی کے لیے کوئی اقدام نہیں کیا گیا۔
ذرائع کے مطابق اگرچہ سکریٹریٹ میں واٹر سپلائی مشن موجود ہے، لیکن فلٹر کے خراب ہونے سے عوام کو شدید پریشانی کا سامنا ہے، خاص طور پر وہ افراد جو دور دراز اضلاع سے اپنے مسائل کے حل کے لیے آتے ہیں۔
روزانہ سیکڑوں افراد سکریٹریٹ کا رخ کرتے ہیں تاکہ اپنی عرضداشتیں پیش کر سکیں، لیکن پینے کے پانی کا کوئی انتظام نہ ہونے کی وجہ سے یا تو انہیں پانی ساتھ لانا پڑتا ہے یا پھر پیاسا رہنا پڑتا ہے۔
جوں جوں درجہ حرارت بڑھ رہا ہے، صورتحال مزید خراب ہوتی جا رہی ہے۔ عوامی سہولتوں کی اس لاپرواہی پر حکومت کو تنقید کا سامنا ہے۔
شہریوں نے انتظامیہ سے فوری مطالبہ کیا ہے کہ خراب واٹر پیوریفائر کی مرمت یا تبدیلی عمل میں لائی جائے اور کم از کم صاف پانی کی فراہمی کو یقینی بنایا جائے، جو کہ ایک بنیادی سہولت ہے۔
سیکریٹریٹ کے ہر منزل پر ویسے کچھ فلٹر موجود ہوتے ہیں لیکن ان میں سے تمام کار کرد نہیں ہوتے۔
عمارت کے اندر داخل ہو کر متعلقہ دفتر تک پہنچنے میں ہی عوام کا پیاس سے برا حال ہو جاتا ہے۔
