حیدرآباد: مرکزی حکومت نے Secunderabad Railway Station پر ریلوے سکیورٹی کو بہتر بنانے کے مقصد سے کاوچ سنٹر آف اکسیلنس کے نام سے ایک تحقیقی ادارہ قائم کرنے کا اعلان کیا ہے، جس کے لئے 265 کروڑ روپۓ منظور کئے گئے ہیں۔
یہ ادارہ انڈین ریلوے میں سکیورٹی کے معیار کو بڑھانے کے لئے دیسی ٹکنالوجی “کاوچ” کی ترقی پر کام کرے گا۔ کاوچ ایک جدید اور خودکار ٹرین تحفظ نظام ہے، جو ٹرینوں کے درمیان ٹکراؤ، سگنل کی خلاف ورزی یا ڈرائیور کی کوتاہی کی صورت میں فوری بریک لگا کر حادثات کو روکنے کی صلاحیت رکھتا ہے۔
یہ تحقیقی مرکز پہلے ہی سکندرآباد میں موجود انڈین ریلوے انسٹی ٹیوٹ آف سگنل انجینئرنگ اینڈ ٹیلی کمیونکیشن میں اپنی سرگرمیاں شروع کرچکا ہے۔ اس کا مقصد ریلوے اسٹاف کو تربیت فراہم کرنا، کاوچ ٹکنالوجی کو مزید موثر بنانا اور عالمی معیار کی سکیورٹی ٹکنالوجیز کو فروغ دینا ہے۔
ادارہ میں نئے بریکنگ سسٹمس، لوکو ٹو لوکو کمیونکیشن جیسی ٹکنالوجیز کی تیاری کی جائے گی۔ اس کے علاوہ، حیدرآباد کے چند انجینئرنگ کالجوں کے ساتھ اشتراک کرتے ہوئے طلبہ کو ان جدید ٹکنالوجیز پر تربیتی کورسس بھی فراہم کئے جائیں گے۔
مرکزی حکومت کا یہ قدم تلنگانہ کو ریلوے سکیورٹی کے میدان میں قومی سطح پر ممتاز مقام دلانے کے مقصد سے اٹھایا گیا ہے، تاکہ ملک کو عالمی معیار کی سکیورٹی ٹکنالوجی دستیاب ہوسکے۔
