حیدرآباد: پٹن چیرو منڈل کے پاشامائیلارم صنعتی علاقے میں واقع سگاچی انڈسٹریز میں ہوئے خوفناک دھماکے میں مرنے والوں کی تعداد بڑھ کر 44 ہو گئی ہے، جب کہ مزید دو شدید زخمی مزدور، اکھلیشور اور عارف، منگل کے روز دوران علاج جانبر نہ ہو سکے۔
دونوں مزدور نجی دواخانوں میں زیر علاج تھے جہاں ان کی حالت انتہائی تشویشناک بنی ہوئی تھی۔ [en]Sigachi Blast[/en] کے بعد سے مجموعی طور پر 14 افراد تاحال دواخانوں میں زیر علاج ہیں۔
ریسکیو آپریشن کا یہ دسواں دن ہے اور ملبہ ہٹانے کا کام اب آخری مرحلے میں داخل ہو چکا ہے۔ باوجود اس کے، حکام نے تصدیق کی ہے کہ اب بھی 8 مزدور لاپتہ ہیں جن کا کوئی سراغ نہیں ملا ہے۔
یہ سانحہ نہ صرف صنعتی حفاظتی نظام کی ناکامی کو بے نقاب کرتا ہے بلکہ فیکٹری انتظامیہ اور معائنہ کرنے والے اداروں کی لاپروائی کو بھی اجاگر کرتا ہے۔ ریاستی حکومت اور متعلقہ محکمہ جات پر دباؤ بڑھ رہا ہے کہ وہ ملبہ صاف کرنے کے بعد باقی لاپتہ افراد کے بارے میں وضاحت پیش کریں۔
پاشامائیلارم کے صنعتی زون میں کام کرنے والے دیگر مزدوروں اور ان کے اہلِ خانہ میں خوف و ہراس کا ماحول ہے، جب کہ متاثرہ خاندان انصاف اور معاوضے کا مطالبہ کر رہے ہیں۔
