حیدرآباد: [en]Sigachi Blast[/en] کو آل انڈیا مجلس اتحاد المسلمین کے صدر اسدالدین اویسی نے بدھ کے روز ایک انتہائی افسوسناک واقعہ قرار دیا اور ریاستی حکومت سے مطالبہ کیا کہ وہ فوری تحقیقات کا حکم دے۔
اویسی نے کہا کہ سگاچی فارما فیکٹری میں پیش آئے اس دھماکے میں 36 سے زائد مزدور ہلاک ہوئے، جن میں بیشتر کا تعلق جھارکھنڈ سے بتایا جا رہا ہے۔ انہوں نے اس بات پر شدید تشویش ظاہر کی کہ بعض لاشیں بری طرح جھلس چکی ہیں، جن کی شناخت صرف ڈی این اے ٹیسٹ کے ذریعے ہی ممکن ہے۔
انہوں نے امید ظاہر کی کہ وزیراعلیٰ ریونت ریڈی کی جائے واقعہ پر آمد کے بعد تحقیقات تیزی سے آگے بڑھیں گی۔
اویسی نے مزید مطالبہ کیا کہ اگر تحقیقات میں سگاچی فارما انتظامیہ کی لاپرواہی ثابت ہو، تو ان کے خلاف فوری اور سخت قانونی کارروائی کی جائے، تاکہ متاثرہ خاندانوں کو انصاف مل سکے اور مستقبل میں ایسے حادثات سے بچاؤ ممکن ہو۔
