حیدرآباد: تلنگانہ کے سنگاریڈی ضلع میں ایک شخص کی خراٹوں کے علاج کے لیے کرائی گئی سرجری کے چند گھنٹوں بعد موت واقع ہوگئی، جس کے بعد لواحقین نے اسپتال کے خلاف احتجاج کیا۔
تفصیلات کے مطابق، گارکورتی گاؤں کے 45 سالہ وی سرینواس کو خراٹوں کی شدید شکایت تھی، جس کی وجہ سے اس کے ساتھ رہنے والے افراد کو بھی مشکلات کا سامنا تھا۔ علاج کے لیے وہ سنگاریڈی کے ایک نجی اسپتال پہنچا، جہاں ڈاکٹروں نے سرجری کے ذریعے مکمل صحت یابی کی یقین دہانی کرائی۔
بدھ کی رات سرینواس کی سرجری کی گئی، لیکن چند گھنٹوں بعد ہی اس کی موت واقع ہوگئی۔ اس واقعے کے بعد لواحقین نے اسپتال کے خلاف احتجاج شروع کردیا، جس پر پولیس موقع پر پہنچ کر صورتحال کو قابو میں لانے کی کوشش کی۔
پولیس نے احتجاجیوں کو یقین دہانی کرائی کہ معاملے کی مکمل تحقیقات کی جائیں گی، جبکہ لواحقین طبی غفلت کے پہلو پر بھی سوالات اٹھا رہے ہیں۔ پولیس نے اس واقعے سے متعلق مزید کارروائی شروع کردی ہے۔
