حیدرآباد: چیف منسٹر اے ریونت ریڈی CM Revanth Reddy نے تعلیمی معیار کو بلند کرنے کی سمت ایک اہم قدم اٹھاتے ہوئے جمعہ کو اعلان کیا کہ موجودہ تعلیمی سال میں تلنگانہ میں 571 نئے سرکاری اسکول قائم کیے جائیں گے، جو تعلیمی شعبے کی مکمل تنظیم نو کے ایک بڑے منصوبے کا حصہ ہوں گے۔
وزیراعلیٰ ریونت ریڈی نے انٹیگریٹڈ کمانڈ کنٹرول سنٹر میں محکمہ تعلیم کے اعلیٰ عہدیداروں کے ساتھ جائزہ اجلاس کی صدارت کرتے ہوئے کہا کہ ریاست کے ہر بچے تک معیاری تعلیم پہنچانا حکومت کی اولین ترجیح ہے اور اس مقصد کے لیے بنیادی ڈھانچے، اساتذہ کی تربیت، اور تعلیمی وسائل پر مکمل توجہ دی جائے گی۔
یہ نئے اسکول اُن دیہاتوں اور قصبوں میں قائم کیے جائیں گے جہاں بچوں کی تعداد 20 سے زائد ہے۔ ریونت ریڈی نے کہا کہ ہمارا مقصد صرف تعلیم تک رسائی نہیں بلکہ اعلیٰ معیار کی تعلیم ہے، جس میں مہارت پر مبنی اور زبان سے مالا مال نصاب کو شامل کیا جائے گا۔
انہوں نے محکمہ تعلیم کو ہدایت دی کہ ہائی اسکول کی سطح سے ہی مہارت سکھانے والے مضامین شامل کیے جائیں تاکہ طلبہ اپنی دلچسپیوں اور صلاحیتوں کے مطابق مستقبل کا راستہ منتخب کر سکیں۔ ان کے بقول، بدلتی ہوئی دنیا میں کامیابی کے لیے ابتدائی مرحلے سے ہی اسکل ڈیولپمنٹ نہایت اہم ہے۔
چیف منسٹر نے ریاست کی تیزی سے شہری ہونے والی آبادی کے پیش نظر، محکمہ تعلیم کو ہدایت دی کہ میونسپل اداروں اور ایچ ایم ڈی اے کے ساتھ تال میل پیدا کرتے ہوئے، میونسپل لے آؤٹس میں عوامی استعمال کی اراضی پر اسکول قائم کیے جائیں۔
مزید برآں، ریونت ریڈی نے ایس سی، ایس ٹی، بی سی اور اقلیتی اداروں کی تنظیم نو کی ہدایت دی تاکہ طلبہ اور اساتذہ کا تناسب بہتر ہو اور ہر اسکول میں خاطر خواہ تعداد میں طلبہ داخل ہوں۔
انہوں نے گُروکل اسکولوں کی بڑھتی ہوئی مقبولیت کا ذکر کرتے ہوئے کہا کہ ان اداروں میں معیاری کھانا، یونیفارم اور کتابیں فراہم کی جاتی ہیں، جس سے عوام کا اعتماد بڑھا ہے۔ انہوں نے عہدیداروں سے کہا کہ دن میں تعلیم حاصل کرنے والے گُروکل طلبہ کو بھی یہی سہولتیں فراہم کرنے کے امکانات کا جائزہ لیا جائے۔
طلبہ کی ہمہ جہتی نشو و نما کی اہمیت پر زور دیتے ہوئے ریونت ریڈی نے مشورہ دیا کہ اسکولوں میں رہنمائی نشستیں منعقد کی جائیں تاکہ بچے اپنی خاندانی اور سماجی ذمہ داریوں کو سمجھ سکیں۔ ان کے مطابق، ہمارا مقصد صرف تعلیم یافتہ افراد تیار کرنا نہیں بلکہ ذمہ دار شہری پیدا کرنا ہے، جن میں ذہنی استقامت اور اخلاقی اقدار ہوں۔
اس اعلیٰ سطحی اجلاس میں چیف منسٹر کے مشیر ویم نریندر ریڈی، ریاستی مشیر کے کیشو راؤ، اسپیشل سکریٹری اجیت ریڈی، چیف منسٹر کے سکریٹری منیک راج، سکریٹری تعلیم یوگیتا رانا، کمشنر ٹیکنیکل ایجوکیشن شری دیو سینا، اور ڈائریکٹر اسکول ایجوکیشن نرسمہا ریڈی نے شرکت کی۔
ప్రభుత్వ పాఠశాలల్లో విద్యా ప్రమాణాలు పెంచాలన్నదే తమ ప్రభుత్వ లక్ష్యమని ముఖ్యమంత్రి శ్రీ @revanth_anumula గారు చెప్పారు. ప్రతి విద్యార్థికి నాణ్యమైన విద్య అందించడానికి అవసరమైన మౌలిక వసతులు, ఉపాధ్యాయులకు శిక్షణ, ఇతర సదుపాయాల కల్పనకు ఎంత వ్యయమైనా వెనుకాడేది… pic.twitter.com/Kfevse2aBQ
— Telangana CMO (@TelanganaCMO) June 13, 2025
