حیدرآباد: تلنگانہ کی ٹیکنالوجی سے متعلق خواہشات کو اس وقت نئی طاقت ملی جب نانک رام گوڑہ کے فائنینشل ڈسٹرکٹ میں ایورجنٹ ٹیکنالوجیز کے گلوبل ویلیو سنٹر کا افتتاح عمل میں آیا، جو ریاست کے AI Future سینٹر بننے کے وژن کو مزید تقویت دے گا۔
تقریب سے خطاب کرتے ہوئے وزیر صنعت و آئی ٹی سریدھر بابو نے کہا کہ یہ افتتاح تلنگانہ کی بڑھتی ہوئی عالمی کشش اور مصنوعی ذہانت میں قومی مرکز بننے کی سمت ایک اہم قدم ہے۔ انہوں نے ایورجنٹ کمپنی کی جانب سے حیدرآباد میں سرمایہ کاری کی ستائش کی اور بتایا کہ اس نئے سنٹر کے ذریعے اب تک 600 ملازمتیں پیدا ہو چکی ہیں، جب کہ آئندہ چند مہینوں میں یہ تعداد 1,000 تک پہنچنے کی امید ہے۔
وزیر نے یہ بھی انکشاف کیا کہ وزیر اعلیٰ ریونت ریڈی کی قیادت میں گزشتہ 18 مہینوں کے دوران ریاست نے 3 لاکھ کروڑ روپئے کی سرمایہ کاری حاصل کی ہے۔ انہوں نے حیدرآباد کے مجوزہ فیوچر سٹی کے اندر 200 ایکڑ پر مشتمل اے آئی سٹی کے قیام کا اعلان بھی کیا، جو مصنوعی ذہانت، مشین لرننگ، اور کوانٹم کمپیوٹنگ جیسے جدید شعبوں میں ریاست کو قیادت کے مقام پر پہنچانے کی کوشش ہے۔
سریدھر بابو نے نوجوانوں کی مہارتوں میں اضافہ اور نئی سوچ رکھنے والے اسٹارٹ اپس کی سرپرستی کو حکومت کی ترجیحات میں شامل قرار دیا۔ انہوں نے کہا کہ ہم تلنگانہ کو صرف اختراعات کا مرکز نہیں بلکہ اگلی نسل کے ٹیک لیڈروں کا لانچ پیڈ بنانا چاہتے ہیں۔
اس موقع پر آئی اے ایس افسر بھوانی سری، آئی ٹی مشیر سائی کرشنا، اور ایورجنٹ کے بانی و سی ای او وجے سجا بھی موجود تھے، جنہوں نے تلنگانہ کی ڈیجیٹل معیشت کے لیے طویل مدتی وژن پر اعتماد کا اظہار کیا۔
