حیدرآباد: Telangana حکومت نے ریاست کی یوم تاسیس کے موقع پر سرکاری ملازمین کے لیے ایک ڈیئرنس الاونس (ڈی اے) دینے کا فیصلہ کیا ہے۔ چیف منسٹر ریونت ریڈی 2 جون کو یوم تاسیس کی سرکاری تقریب کے دوران اس کا باضابطہ اعلان کریں گے۔
سرکاری ذرائع کے مطابق، ڈی اے کے ساتھ ساتھ ملازمین کو بقایا جات اور ریٹائرمنٹ سے متعلق فوائد کی فوری ادائیگی پر بھی ایک اہم بیان متوقع ہے۔ اس موقع پر حکومت کی جانب سے ایک نئی ہیلت اسکیم کا اعلان بھی ممکن ہے، جو ملازمین اور ان کے خاندانوں کی طبی فلاح و بہبود کو پیش نظر رکھ کر تیار کی گئی ہے۔
واضح رہے کہ حالیہ دنوں ریاستی حکومت نے سرکاری ملازمین کے مسائل کا جائزہ لینے اور ان کے مطالبات کی یکسوئی کے لیے تین سینئر عہدیداروں پر مشتمل ایک خصوصی کمیٹی تشکیل دی تھی۔ اس کمیٹی نے متعدد مرتبہ سرکاری ملازمین کی یونینز کے ساتھ مشاورت کی اور ان کے مختلف مطالبات کو سنا۔
ذرائع کا کہنا ہے کہ کمیٹی نے بعض اہم مطالبات کو منظور کر لیا ہے اور ایک یا دو دن میں یہ کمیٹی اپنی مکمل رپورٹ چیف منسٹر ریونت ریڈی کو پیش کرنے والی ہے۔ رپورٹ کی منظوری کے بعد چیف سکریٹری راماکرشنا راو اس سلسلے میں باضابطہ اعلامیہ جاری کریں گے۔
ریاست کے سرکاری ملازمین میں یوم تاسیس کے موقع پر ممکنہ اعلانات کے باعث خوشی اور اُمید کی فضا پائی جا رہی ہے۔
