حیدرآباد: جاپان میں تلنگانہ کے وزیر اعلیٰ ریونت ریڈی نے ایک تقریب سے خطاب کرتے ہوئے کہا کہ ریاست کو عالمی ترقی کے پیمانوں پر لے جانا حکومت کا مقصد ہے۔ انہوں نے کہا کہ Telangana Development Vision کے ذریعے صنعتی ترقی، انفراسٹرکچر میں وسعت اور ماحول دوست شہری منصوبہ بندی پر زور دیا جا رہا ہے۔
ریونت ریڈی نے کہا کہ تلنگانہ نے آئی ٹی اور فارما کے شعبوں میں نمایاں ترقی کی ہے، اب ریاست میں ڈرائی پورٹ قائم کرنے کی بھی تیاری ہو رہی ہے تاکہ عالمی تجارت سے ریاست کو جوڑا جا سکے۔
وزیر اعلیٰ نے کہا کہ وہ ٹوکیو میں دریا کے کنارے تیار کیے گئے ریور فرنٹ ماڈل کا مشاہدہ کیا گیا، جو ایک متاثر کن شہری ترقی کی مثال ہے۔ اسی طرز پر حیدرآباد میں موسیٰ ندی کی صفائی کا منصوبہ نافذ کیا جا رہا ہے۔ تاہم انہوں نے کہا کہ کچھ حلقے اس منصوبے کی راہ میں رکاوٹیں کھڑی کر رہے ہیں۔
انہوں نے دہلی کی آلودگی کا حوالہ دیتے ہوئے کہا کہ وہاں ماحولیاتی بحران کے باعث سرکاری ادارے بند کرنا پڑ رہے ہیں۔ حیدرآباد میں ایسی صورتحال سے بچنے کے لیے بروقت اقدامات ضروری ہیں۔
ریونت ریڈی نے کہا کہ موسیٰ ندی کی صفائی، میٹرو ریل کی توسیع، ریجنل رنگ روڈ اور ریڈئیل روڈ جیسے منصوبے تلنگانہ کی ترقی کے لیے نہایت اہم ہیں۔
تلنگانہ کے تارکین وطن کو ریاست کی ترقی میں کردار ادا کرنے کی دعوت
وزیر اعلیٰ نے بیرون ملک مقیم تلنگانہ کے شہریوں سے اپیل کی کہ وہ اپنی ریاست کی ترقی میں حصہ لیں۔ انہوں نے کہا کہ سرمایہ کاری بڑھانا، صنعتوں کو فروغ دینا اور نوجوانوں کے لیے روزگار کے مواقع پیدا کرنا ریاستی حکومت کا مقصد ہے۔
ریونت ریڈی نے کہا کہ اگر ہر شخص اپنی استطاعت کے مطابق ریاست کے لیے کچھ کرے، تو تلنگانہ دنیا بھر کے ساتھ مقابلہ کرنے کے قابل ہو جائے گا۔ انہوں نے کہا کہ ریاستی ترقی میں جو خوشی اور فخر ملتا ہے، وہ ناقابل بیان ہے، اور ہمیں مل کر آگے بڑھنا ہوگا۔
