حیدرآباد: ریاست میں مانسون کی آمد کے ساتھ ہی Telangana Rainfall کا سلسلہ زور پکڑ رہا ہے اور آج دوسرے دن بھی کئی اضلاع میں موسلادھار بارش دیکھی گئی۔
بھوپال پلی، ورنگل، عادل آباد، سرسلہ، محبوب آباد اور جگتیال سمیت متعدد اضلاع میں بارش کے ساتھ گرج و چمک اور تیز ہوائیں ریکارڈ کی گئیں۔ محکمہ موسمیات نے خبردار کیا ہے کہ آئندہ 2 دنوں تک ریاست کے بیشتر علاقوں میں گرج چمک، تیز ہواؤں اور شدید بارش کا امکان ہے۔
ضلع بھوپال پلی کے کاٹا رام، مادھاپور، مہامتارام اور پلی میلا منڈلوں کے کئی دیہات میں منگل کی شام شدید بارش ہوئی، جبکہ کچھ مقامات پر آسمانی گرج کے ساتھ موسلادھار بارش ریکارڈ کی گئی۔
ورنگل شہر، ہنمکنڈہ اور ورنگل رورل علاقوں میں بھی شدید بارش کے ساتھ موسم نے کروٹ لی۔ نرسم پیٹ ڈیویژن کے کئی مقامات پر تیز ہواوں کے ساتھ بارش ہوئی۔
عادل آباد ضلع کے ایچوڑہ، نیراڈی گنڈہ، گڈی ہتنور اور سرکنڈہ منڈلوں میں بھی موسلادھار بارش ہوئی جس کے نتیجے میں کئی تالاب اور کنٹوں میں پانی جمع ہوگیا۔
سرسلہ ضلع کے ویملواڑہ ٹاؤن میں تقریباً 2 گھنٹے تک موسلادھار بارش جاری رہی، جس سے سڑکوں پر پانی جمع ہوگیا اور سولہویں وارڈ کے گھروں میں پانی داخل ہوا۔ آٹو رکشاؤں سمیت کئی گاڑیوں کو مشکلات پیش آئیں۔
محبوب آباد کے بیارم، محبوب آباد اور کتہ گوڑہ منڈلوں میں بھی بارش کے ساتھ گرج و چمک ریکارڈ کی گئی۔ اسی طرح جگتیال ضلع کے کڑمیال اور کونڈاگٹو کے اطراف علاقوں میں بارش کا سلسلہ تقریباً دو گھنٹے جاری رہا۔
ادھر دارالحکومت حیدرآباد میں منگل کو دن بھر شدید گرمی کے بعد سہ پہر میں موسم اچانک تبدیل ہوا اور درجہ حرارت میں کمی دیکھی گئی۔ گریٹر حیدرآباد کے بعض علاقوں اور مضافات میں ہلکی بارش ہوئی جس سے موسم خوشگوار ہوگیا۔
