حیدرآباد: اکسائز پولیس نے ایک خصوصی آپریشن کے دوران دو افراد کو گرفتار کیا جو اڑیسہ سے گانجہ اسمگل کر کے حیدرآباد میں فروخت کر رہے تھے۔ پولیس نے ان کے قبضے سے 2.3 کلو گرام گانجہ ضبط کر لیا۔
شمس آباد کے اسسٹنٹ ایکسائز سپرنٹنڈنٹ سرینواس ریڈی کے مطابق، گرفتار شدگان کی شناخت پردیپ کمار اور گجن لال کے طور پر ہوئی ہے، جو دونوں بہار کے رہائشی ہیں۔ یہ دونوں پہلے یومیہ اجرت پر مزدوری کر کے گزر بسر کر رہے تھے، لیکن مالی مشکلات کے باعث انہوں نے غیر قانونی طور پر گانجہ فروخت کرنے کا فیصلہ کیا۔
تحقیقات کے مطابق، گجن لال اڑیسہ سے گانجہ لا کر حیدرآباد میں پردیپ کمار کو سپلائی کرتا تھا۔ پردیپ اسے چھوٹے پیکٹوں میں تقسیم کر کے مقامی دکانوں پر 150 روپے فی پیکٹ فروخت کرتا تھا۔
مصدقہ اطلاع پر ایکسائز سپرنٹنڈنٹ کرشنا پریہ کی ہدایت پر اسسٹنٹ سپرنٹنڈنٹ سرینواس ریڈی کی قیادت میں انسپکٹر پروین کمار، سب انسپکٹر سریکانت ریڈی اور ٹیم کے دیگر ارکان فخرالدین،
ملیش، نہرو، گنیش، نکھل، اور سائی شنکر نے آرم گھر چوراہے پر چھاپہ مارا۔ اس کارروائی میں گجن لال اور پردیپ کمار کو گرفتار کر کے ان کے قبضے سے 2.3 کلو گرام گانجہ برآمد کیا گیا۔
پولیس نے مقدمہ درج کر کے مزید تحقیقات شروع کر دی ہیں۔
