Uttam Kumar Reddy، حیدرآباد: تلنگانہ کے وزیر آبپاشی جو ماضی میں انڈین ایئر فورس میں مگ-23 فائٹر طیارے اڑاتے تھے، نے جمعہ کے روز گاندھی بھون میں غیر رسمی گفتگو کے دوران اپنے عسکری پس منظر اور بھارت-پاکستان کشیدگی پر کھل کر اظہار خیال کیا۔ انہوں نے واضح کیا کہ اگر ملک کو ان کی ضرورت پڑی، تو وہ دوبارہ لڑنے کے لیے تیار ہیں۔
ریڈی نے بتایا کہ انہوں نے صرف 16 سال کی عمر میں مسلح افواج میں شمولیت اختیار کی تھی، اور 1982 تک وہ مگ-21 طیارے اڑا رہے تھے۔ بعد ازاں وہ مگ-23 جیسے تیز رفتار جنگی طیارے کے پائلٹ بھی بنے، جو آواز کی رفتار سے دو گنا زیادہ تیز پرواز کرتا ہے۔
ریڈی نے بتایا کہ وہ بیس سال کی عمر میں مکمل فائٹر پائلٹ بن چکے تھے، اور ان کی تعیناتی اتر پردیش، سرینگر اور امرتسر جیسے حساس علاقوں میں رہی۔ ان کے مطابق، 22 اپریل کو ہونے والا واقعہ ایک دہشت گرد حملہ تھا، جسے پاکستان کی پشت پناہی حاصل تھی۔ انہوں نے مذہب کے نام پر ہونے والی ہلاکتوں کی شدید مذمت کی اور کہا کہ پورا ملک، بشمول کشمیر، اس حملے کی مخالفت میں متحد ہے۔
ریڈی نے “دی ریزسٹنس فرنٹ” نامی تنظیم کو اس حملے کا ذمے دار قرار دیا، جس کا تعلق لشکر طیبہ سے ہے۔ ان کے مطابق، بھارت کو جوابی کارروائی کا پورا حق حاصل تھا، اور حالیہ فوجی ردعمل اسی کا حصہ تھا۔
انہوں نے ‘آپریشن سندور’ کا ذکر کرتے ہوئے کہا کہ اس کارروائی میں رافیل طیاروں اور خودکش ڈرونز کا استعمال کیا گیا، اور یہ سب کچھ بھارتی حدود کے اندر سے کیا گیا۔ ان کا کہنا تھا کہ اگر بھارت کشمیر مسئلے کا مستقل حل چاہتا ہے، تو ایسے مضبوط اقدامات ناگزیر ہیں۔
اتم کمار ریڈی نے بغیر کسی ہچکچاہٹ کے کہا کہ بھارت-پاکستان تنازع اس وقت تک حل نہیں ہو سکتا جب تک بھارت پاکستان کے زیر قبضہ کشمیر کو واپس نہ لے لے۔ انہوں نے جموں میں ہونے والے حملے کو بھارت پر سیدھی ضرب قرار دیا اور کہا کہ اس کا جواب دینا ناگزیر تھا۔
ان کے مطابق، اگر پاکستان کی جانب سے حملے جاری رہے، تو اس کے لیے سنگین نتائج سامنے آ سکتے ہیں۔ انہوں نے نشاندہی کی کہ ایسی کسی بھی صورت حال میں کوئی تیسرا ملک پاکستان کی فوجی مدد کے لیے نہیں آئے گا۔
جب ان سے پوچھا گیا کہ اگر جنگ کی نوبت آ جائے تو وہ کیا کریں گے؟ تو ان کا واضح جواب تھا: “اگر مکمل جنگ ہوئی اور ملک نے پکارا، تو میں پھر سے لڑنے کے لیے تیار ہوں۔”
