حیدرآباد: انسداد بدعنوانی بیورو (ACB) کے عہدیداروں نے پیر کے روز ضلع میدک کے بودھیرا گاؤں کی گرام سکریٹری ناگ لکشمی کو 8 ہزار روپئے رشوت لیتے ہوئے رنگے ہاتھوں گرفتار کر لیا۔
[en]Budhera Bribery Case[/en] کے بارے میں میدک اے سی بی ڈی ایس پی سدھارشن نے بتایا کہ ملزمہ نے کوہیر منڈل کے ایک رہائشی سے بودھیرا چوراہے پر واقع واٹر سروسنگ سنٹر اور اوپن پلاٹ کو مکان نمبر الاٹ کرنے کے بدلے یہ رقم طلب کی تھی۔
شکایت گزار نے معاملہ اے سی بی کے علم میں لایا، جس کے بعد بیورو کی ہدایت پر پیر کو وہ گرام سکریٹری سے ملا اور مطلوبہ رقم حوالے کی۔ رقم لیتے ہی اے سی بی اہلکاروں نے ناگ لکشمی کو موقع پر ہی رنگے ہاتھوں گرفتار کر لیا۔
انسداد بدعنوانی بیورو نے عوام سے اپیل کی ہے کہ اگر کسی سرکاری عہدیدار کی جانب سے رشوت طلب کی جائے تو بلا جھجک اطلاع دی جائے۔ شکایات ٹول فری نمبر 1064 یا واٹس ایپ نمبر 9440446106 پر درج کروائی جا سکتی ہیں۔ مزید معلومات یا شکایات کے لیے بیورو کی سرکاری ویب سائٹ [https://acb.telangana.gov.in](https://acb.telangana.gov.in) یا فیس بک پیج بھی استعمال کیے جا سکتے ہیں۔
بیورو نے یقین دہانی کروائی ہے کہ شکایت کنندگان کی شناخت مکمل طور پر صیغہ راز میں رکھی جائے گی۔
