کانگریس نے لگایا بی جے پی پر راہل گاندھی کی ذات پر سیاست کا الزام

حیدرآباد: تلنگانہ پردیش کانگریس کمیٹی (TPCC) کے جنرل سیکریٹری اڈنکی دیاکر نے بی جے پی قائدین کی جانب سے راہل گاندھی کی ذات اور مذہب پر دیے گئے بیانات پر سخت ردعمل ظاہر کیا ہے۔

ایک ویڈیو بیان میں دیاکر نے کہا کہ بی جے پی لیڈران راہل گاندھی کے پس منظر سے ناواقف ہیں اور ان کے بارے میں گمراہ کن باتیں پھیلا رہے ہیں۔ انہوں نے وضاحت کی کہ راہل گاندھی ‘پنڈت’ برادری سے تعلق رکھتے ہیں اور وہ براہمن ہیں۔

انہوں نے مزید کہا کہ بی جے پی راہل گاندھی کی آئین کی حفاظت اور محروم طبقات کے حق میں جدوجہد سے خائف ہے۔ ان کے مطابق، بی جے پی کا نظریہ “منو وادی” ہے اور اسی وجہ سے وہ گاندھی خاندان پر حملے کر رہی ہے۔

دیاکر نے وزیر اعظم نریندر مودی پر بھی نشانہ سادھا، یہ دعویٰ کرتے ہوئے کہ وہ “کنورٹید بی سی” ہیں، نہ کہ اصل طور پر کسی پسماندہ برادری سے۔ انہوں نے کہا کہ بی جے پی لیڈران اب راہل گاندھی کی ذات پر سوال اٹھا رہے ہیں کیونکہ انہیں مودی کے بارے میں کیے گئے دعوے ہضم نہیں ہو رہے۔