حیدرآباد: پارٹ ٹائم جاب کا جھانسہ دے کر سائبر مجرموں نے ملکاجگری سے تعلق رکھنے والی ایک خانگی ملازمہ سےPart-Time Job Scam 8 لاکھ روپئے کا آن لائن فراڈ کیا۔ مجرموں نے خود کو گوگل کے مبینہ “پروموشن ڈپارٹمنٹ” کا نمائندہ ظاہر کرتے ہوئے خاتون کو بڑے معاوضے کا لالچ دیا۔
پولیس کے مطابق، متاثرہ خاتون کو سب سے پہلے ٹیلیگرام پر ایک پیغام موصول ہوا، جس میں ایک خاتون نے اپنا نام سریتا بتایا اور دعویٰ کیا کہ وہ گوگل کے گلوبل آن لائن میڈیا پارٹ ٹائم جابز ڈویژن سے وابستہ ہے۔ سریتا نے بتایا کہ انہیں ہوٹلس اور ریسٹورنٹس پر گوگل میپس پر ریویو لکھنے کا کام دیا جائے گا۔
شروع میں خاتون سے 1,040روپئے بطور رجسٹریشن فیس مانگے گئے، اور ہر ٹاسک پر 50روپئے ادا کرنے کا وعدہ کیا گیا۔ ابتدائی طور پر 20 ٹاسکس دیے گئے اور بعد میں مزید مہنگے اسائنمنٹس کا لالچ دیا گیا۔
اسکرین پر بڑھتے ہوئے بیلنس کو دیکھ کر متاثرہ خاتون نے کئی بار رقم منتقل کی۔ بعد میں مجرموں نے دعویٰ کیا کہ کچھ ٹاسکس درست طریقے سے مکمل نہیں ہوئے، اور ان کی کمائی لاک ہو گئی ہے، جو صرف مزید ٹاسکس مکمل کرنے پر جاری کی جائے گی—ہر نئے ٹاسک کے لیے علیحدہ ادائیگی درکار تھی۔
ان چالاک ہتھکنڈوں کے ذریعے خاتون سے مجموعی طور پر 8 لاکھ روپئے وصول لیے گئے۔ جب مزید رقم مانگی گئی تو خاتون کو احساس ہوا کہ وہ ایک بڑے پارٹ ٹائم جاب اسکام کا شکار ہو چکی ہیں، جس کے بعد انہوں نے رچہ کنڈہ سائبر کرائم پولیس سے رجوع کیا۔
پولیس نے کیس درج کرتے ہوئے تفتیش کا آغاز کر دیا ہے۔ حکام نے عوام کو خبردار کیا ہے کہ وہ غیر مصدقہ ذرائع سے ملنے والی جاب آفرز سے محتاط رہیں اور کسی بھی مشکوک سرگرمی کی فوری اطلاع دیں۔