منتهنی کے مضافات میں ہائی لیول پل کے لیے 125 کروڑ روپئے کی منظوری؛ جلد ٹنڈرز کی طلبی

حیدرآباد: تلنگانہ حکومت نے ضلع پید اپلی کے منتهنی کے مضافات میں ہائی لیول پل کی تعمیر کے لیے 125 کروڑ روپئے منظور کیے ہیں۔ یہ پل گوداوری ندی پر منتهنی کو ضلع منچریال کے چنور سے جوڑے گا۔ اس منصوبے سے دونوں شہروں کے درمیان موجودہ 70 کلومیٹر فاصلے کو کم کرکے تقریباً 35 کلومیٹر کیا جائے گا، جس سے سفر میں آسانی اور علاقائی تجارت میں اضافہ ہوگا۔ وزیر اعلیٰ اے ریونت ریڈی نے حال ہی میں اس 920 میٹر طویل پل کا ورچوئل سنگ بنیاد رکھا ہے۔ محکمہ عمارات و شوار ع نے اشارہ دیا ہے کہ اس منصوبے کے لیے جلد ہی ٹینڈرز طلب کیے جائیں گے، اور پل کو ایک سال کے اندر مکمل کرنے کا منصوبہ ہے۔ فی الحال، مقامی عوام عموماً کشتیوں کا استعمال کرتے ہیں یا گرمیوں میں جب پانی کی سطح کم ہوتی ہے تو عارضی مٹی کے راستوں سے ندی عبور کرتے ہیں۔ نیا پل علاقے میں مستقل اور قابل اعتماد حمل و نقل کا راستہ فراہم کرے گا، جس سے رابطہ اور اقتصادی سرگرمیوں میں اضافہ ہوگا۔