حیدرآباد: چیف منسٹر اے ریونت ریڈی نے کہا ہے کہ یوتھ کانگریس کارکنوں کی ذمہ داری ہے کہ وہ حکومت کی بہبودی اسکیمات کو عوام تک پہنچائیں۔ وہ جمعہ کو گاندھی بھون میں تلنگانہ یوتھ کانگریس کمیٹی کے نو منتخبہ عہدیداروں کی حلف برداری تقریب سے خطاب کر رہے تھے۔
چیف منسٹر نے کہا کہ آئندہ ادارہ جاتِ مقامی کے انتخابات میں ان کارکنوں کو پارٹی ٹکٹ دیئے جائیں گے جنہوں نے ریاست میں کانگریس کو برسراقتدار لانے میں نمایاں کردار ادا کیا ہے۔ انہوں نے اعتراف کیا کہ حکومت عوامی بہبود کے لئے کئی اقدامات کر رہی ہے، لیکن ان کی مناسب تشہیر نہیں ہو پا رہی۔
ریونت ریڈی نے یوتھ کانگریس کارکنوں کو مشورہ دیا کہ وہ اسمبلی انتخابات کی طرح مقامی انتخابات میں بھی سرگرم حصہ لیں اور عوام سے رابطے میں رہیں۔ انہوں نے کہا کہ محض دولت کے بل بوتے پر انتخابات میں کامیابی ممکن نہیں، بلکہ عوامی تائید و حمایت حاصل کرنا ضروری ہے۔
چیف منسٹر نے کارکنوں کو متنبہ کیا کہ اگر وہ قائدین کے آس پاس گھومنے تک محدود رہیں گے تو انہیں کوئی عہدہ نہیں ملے گا۔ انہوں نے زور دے کر کہا کہ اگر جدوجہد سڑکوں سے شروع ہو تو دہلی تک پہنچنے کے امکانات ہوتے ہیں۔ اس موقع پر پارٹی کے کئی سینئر قائدین بھی موجود تھے۔