حیدرآباد: ہنگامی حالات سے نمٹنے کی تیاریوں کو مضبوط بنانے کے مقصد سے فائر ڈپارٹمنٹ نے جمعہ کو گریٹر حیدرآباد میونسپل کارپوریشن (جی ایچ ایم سی) حدود میں کئی بلند عمارات پر Mock Drills انجام دیے۔ یہ مشقیں شہر حیدرآباد اور ملحقہ اضلاع کے چار اہم مقامات پر بیک وقت منعقد کی گئیں۔
مشقوں کے مقامات میں چارمینار زون کے چنڈرائن گٹہ میں زونل کمشنر آفس، ایل بی نگر کے چترا لے آؤٹ میں منجیرا فیز-II رہائشی اپارٹمنٹس، کوکٹ پلی وائی جنکشن پر اشوکا ون مال، اور پٹن چیرو کے ایسناپور میں ریلائنس سن شائن رہائشی اپارٹمنٹس شامل تھے۔
ان مشقوں کی نگرانی ضلعی فائر آفیسرز (ڈی ایف اوز)، ایڈیشنل ضلعی فائر آفیسرز (اے ڈی ایف اوز)، اور اسٹیشن فائر آفیسرز (ایس ایف اوز) نے کی، جنہوں نے اپنی ٹیموں کے ہمراہ مختلف ہنگامی حالات کی فرضی مشقیں انجام دیں۔ ان مشقوں کا مقصد رہائشیوں اور فائر اہلکاروں کی تیاری، ہم آہنگی اور فوری ردعمل کی جانچ تھا۔
حکام کا کہنا ہے کہ ان مشقوں کا مقصد صرف موجودہ فائر سیفٹی نظام کا جائزہ لینا نہیں بلکہ عمارت میں رہنے والے افراد کو انخلاء کے طریقہ کار سے واقف کروانا اور حقیقی ہنگامی صورتحال میں ان کے ردعمل کے وقت کو بہتر بنانا ہے۔
یہ Mock Drills فائر ڈپارٹمنٹ کی اُس وسیع حکمت عملی کا حصہ ہیں جس کے تحت بلند عمارات میں فائر سیفٹی سے متعلق شعور بیدار کیا جا رہا ہے اور جی ایچ ایم سی کے دائرہ کار میں حفاظتی اصولوں کی سختی سے پابندی کو یقینی بنایا جا رہا ہے۔