حیدرآباد: شہر کے نائٹ لائف مراکز میں نشہ کے بڑھتے استعمال Drug Use کے خلاف کارروائی کرتے ہوئے سائبرآباد کی اسپیشل آپریشن ٹیم (SOT) نے جمعہ کی رات گچی باؤلی اور مادھاپور کے کئی پبز پر چھاپے مارے اور چار نوجوانوں کو حراست میں لے لیا، جن میں ایک ڈی جے بھی شامل ہے۔
قابل اعتماد خفیہ اطلاع کی بنیاد پر کارروائی کرتے ہوئے ایس او ٹی ٹیموں نے ان پبز پر دھاوا بولا جہاں مبینہ طور پر نشہ آور اشیاء کا استعمال ہو رہا تھا۔ جن پبز پر چھاپے مارے گئے ان میں گچی باؤلی کا ’کلب روگ‘ اور مادھاپور کا ’فرَیٹ ہاؤس‘ شامل ہیں، جنہیں ضابطہ خلاف ورزیوں کے ہاٹ اسپاٹ کے طور پر شناخت کیا گیا تھا۔
چھاپوں کے دوران ’کلب روگ‘ میں موجود کئی افراد کے موقع پر ہی ڈرگ ٹیسٹ کیے گئے، جن میں چار افراد کے ٹیسٹ مثبت پائے گئے۔ ان میں ایک ڈی جے شیوا بھی شامل ہے۔ تمام افراد کو حراست میں لے کر مادھاپور پولیس اسٹیشن منتقل کیا گیا۔
گرفتاری کے بعد مادھاپور پولیس نے نارکوٹک ڈرگس اینڈ سائیکو ٹراپک سبسٹنسز (NDPS) ایکٹ کے تحت مقدمہ درج کرتے ہوئے تحقیقات کا آغاز کر دیا ہے۔
سائبرآباد پولیس نے ایک بار پھر واضح کیا ہے کہ شہر کے پبز اور بارز میں کے خلاف سخت کارروائی جاری رہے گی۔ پولیس نے پب مالکان سے اپیل کی ہے کہ وہ اپنے مقامات کو ’ڈرگ فری زون‘ قرار دیں، نابالغوں کو شراب فروخت سے باز رہیں، اور یہ یقینی بنائیں کہ ان کے ادارے نشہ آور سرگرمیوں کا مرکز نہ بنیں۔
ایس او ٹی نے حیدرآباد کے نائٹ لائف مراکز پر نگرانی مزید سخت کر دی ہے اور عوام سے اپیل کی ہے کہ کسی بھی مشتبہ سرگرمی کی فوری اطلاع دیں۔