حیدرآباد: ناگرکرنول ضلع کے ایس ایل بی سی سرنگ میں جاری ریسکیو آپریشن کے 32ویں دن منگل کی دوپہر کو دوسری لاش برآمد ہوئی۔ ضلع کلکٹر بی سنتوش نے اس پیش رفت کی تصدیق کی اور بتایا کہ متوفی کی شناخت اتر پردیش سے تعلق رکھنے والے پراجیکٹ انجینئر منوج کمار کے طور پر ہوئی ہے۔
گزشتہ ایک ماہ سے زائد عرصے سے تقریباً 18 خصوصی ریسکیو ٹیمیں اور سینئر عہدیدار آپریشن میں مصروف ہیں۔ لاش تقریباً 13.5 کلومیٹر اندر سرنگ میں اس وقت دریافت ہوئی جب ایک منی جے سی بی مٹی اور ملبہ صاف کرتے وقت انسانی ہاتھ دکھائی دیا۔ اس کے ساتھ ہی بدبو بھی محسوس کی گئی، جس کے بعد کاروائی میں شدت لائی گئی۔ تقریباً چار گھنٹوں کی محنت کے بعد ٹیموں نے کامیابی سے لاش کو نکال لیا۔
لاش کو پولیس نگرانی میں ناگرکرنول کے سرکاری اسپتال منتقل کیا گیا، جہاں پوسٹ مارٹم کیا گیا۔ بعد ازاں لاش کو خصوصی ایمبولینس کے ذریعے اتر پردیش روانہ کیا جائے گا۔
چیف منسٹر ریونت ریڈی نے منوج کمار کے خاندان کے لیے 25 لاکھ روپے مالی امداد کا اعلان کیا ہے، جو ایک ریونیو عہدیدار کے ذریعے حوالے کی جائے گی۔
ریسکیو ٹیمیں اب بھی ان چھ دیگر مزدوروں کی تلاش میں مصروف ہیں جو تاحال لاپتہ ہیں۔