حیدرآباد: تلنگانہ کانگریس نے بھارت اور پاکستان کے درمیان بڑھتی ہوئی کشیدگی کے پیش نظر ریاست بھر میں تمام Congress meetings اور پارٹی سرگرمیوں کو عارضی طور پر معطل کرنے کا فیصلہ کیا ہے۔ اس فیصلے کے تحت جاری “جئے باپو، جئے بھیم، جئے سمودھان” مہم بھی ملتوی کر دی گئی ہے۔
پردیش کانگریس کمیٹی (پی سی سی) کے صدر مہیش کمار گوڑ نے پارٹی کے تمام ضلعی، منڈل، بلاک اور حلقہ سطح کے قائدین کو زبانی احکامات جاری کرتے ہوئے کہا ہے کہ 11 مئی تک کوئی بھی طے شدہ اجلاس یا سرگرمی منعقد نہ کی جائے۔
اس معطلی میں پارٹی تنظیم کی تشکیلِ نو کے سلسلے میں پی سی سی مبصرین کی جانب سے انجام دی جا رہی دیہی یونٹ سے لے کر ضلعی سطح تک کی کمیٹیوں کے جائزہ اور انتخابی اجلاس بھی شامل ہیں۔
پارٹی ذرائع کے مطابق یہ فیصلہ مکمل طور پر احتیاطی تدبیر کے طور پر لیا گیا ہے، تاکہ موجودہ حالات کے دوران کسی بھی ناخوشگوار صورتحال سے بچا جا سکے۔