حیدرآباد: Mephentermine injections کی غیر قانونی فروخت کے خلاف کارروائی کرتے ہوئے ساؤتھ ایسٹ زون ٹاسک فورس اور بندلہ گوڑہ پولیس نے ایک شخص کو جمعہ کے روز گرفتار کر لیا۔ اس کے قبضے سے 19 وائلز، ایک ہونڈا ایکٹیوا اسکوٹر، اور ایک موبائل فون برآمد کیا گیا، جن کی مجموعی مالیت تقریباً 1.25 لاکھ روپئے بتائی گئی ہے۔
گرفتار ملزم عبدالجبران انصاری، عمر 30 سال، پیشے کے اعتبار سے ویلڈر ہے اور محمد نگر، بندلہ گوڑہ کا رہائشی ہے۔ پولیس کے مطابق وہ یہ انجکشن ہریانہ کے گڑگاؤں میں واقع اپنے ایک رابطہ کار سہندر پرساد سے حاصل کرتا تھا اور مقامی سطح پر مہنگے داموں فروخت کرتا تھا۔
تفتیش میں انکشاف ہوا ہے کہ عبدالجبران بندلہ گوڑہ اور آس پاس کے علاقوں میں ان انجکشنز کی غیر قانونی فروخت کر رہا تھا۔ یہ دوا نوجوانوں میں توانائی بڑھانے کے بہانے استعمال کی جا رہی ہے، حالانکہ طبی ماہرین کے مطابق اس کا بےجا استعمال بلڈ پریشر میں اضافہ، دل کی بیماریوں، اور دیگر سنگین طبی مسائل کا سبب بن سکتا ہے۔
افسران نے عوام، خاص طور پر نوجوانوں، کو متنبہ کیا ہے کہ وہ Mephentermine اور دیگر اس جیسی محرک ادویات سے دور رہیں۔ ایک سینئر افسر نے خبردار کیا کہ بغیر ڈاکٹرکے مشورے کے ایسی دوا کا استعمال خطرناک ثابت ہو سکتا ہے۔
یہ کارروائی ساؤتھ ایسٹ زون ٹاسک فورس کے انسپکٹر ایس۔ سعیدا بابو کی قیادت میں کی گئی، جنہیں سب انسپکٹرز ایس کے قوی الدین، پی سائی رام، ایم مدھو، کانسٹیبل ٹی پرشانت، اور بندلہ گوڑہ پولیس اسٹیشن کے عملے کا تعاون حاصل تھا۔